仲有兩星期就番工啦, 時間過得咁快架! 我算好彩啦, 最後放前0.5後9.5, 因為比預產期早左5日生, 就可以多d產假照顧bb.

昨日開始當番左工咁泵奶俾bb飲, 唔埋身餵, 因為bb同我要實習了. 本來plan每3個鐘泵一次, 但發覺原來好難, 本來預左幾點開始座熱支奶, 點知bb提早肚餓, 趕唔切座熱, 改左埋身餵, 咁就呢餐泵唔到, 同埋由於得我一個睇住bb, 有時剛剛想泵奶, bb又喊緊, 真係分身不暇, 所以昨日勉勉強強泵左2次.

今日就好d啦, 時間預得好左d, 可以泵到3次奶, 但係就隔左3.5小時先泵一次, 因為每次泵奶時, bb又係咁岩喊緊, 明明飲完奶都喊, 肯定係扭計扭抱! 不過我而家抱bb都習慣左, 所以可以邊抱邊泵! bb都幾搞笑喎, 我個電泵都幾嘈, 本來bb喊緊, 我開電泵咁嘈佢反而靜左, 之後仲瞓著左! 哈哈, 仲好, 咁我可以專心泵奶.

今日泵的3次, 第1次因為只泵1邊, 泵到約100ml, 第2同3次就兩邊都泵, 泵到約170-180ml左右, 即大約6安. 希望keep住越泵越多啦, bb越來越大食, 遲d我諗bb要食成8安1餐, 我一定要多d奶先得, 要勤力d泵泵泵同埋身餵, 如果唔係bb唔夠食, 就要補奶粉, 我唔想! 我要做全人奶媽!!! (好似好強的決心, 哈哈!)